« Euskaraldiaz, herriz herri hizkuntza ohituretan eragin »

PrintFriendly and PDF

Euskaraldia1

Heldu den martxoaren 17an, larunbatez, Ipar Euskal Herri mailako Euskaraldia ekimenaren abiatze ofiziala eginen da, goizeko 9:30etik 12:00etara, Itsasuko Sanoki gelan. Euskaraldia, Euskal Herri osoan, herriz herri eta aldi berean gauzatuko den ekimen kolektiboa da. Euskal Herri osoko milaka eta milaka herritarrek 11 egunez (2018ko azaroaren 23tik abenduaren 3ra), euskaraz bizitzeko engaiamendua hartuko dute publikoki.

Tokian toki herritarrek eramanen duten ekimen horren abiatzea izanen da Itsasun. Garrantzi handiko mementoa beraz. Herriz herriko dinamikaren abiatzea izanen da, eta euskalzale oro deitua da Itsasura jin dadin, Lapurdi, Baxe Nafarroa eta Zuberoako ahal bezainbat herritako ordezkari hastapenetik sar daitezen ekimenean.

9:30ean parte hartzaileei harrera eginen zaie, eta ondotik ekimena aurkeztuko dute Euskal Herri mailan Euskaraldia antolatzen duen Topaguneak eta Ipar Euskal Herrian ekimena bultzatuko duen Euskal Konfederazioak.

BAM! iniziatibako ordezkariak ere bertan izanen dira heien lekukotasuna emateko, iaz gisa bereko ekimena egin baizuten Baiona, Angelu eta Miarritzen.

Hitz hartze horien ondotik, ekimena herriz herri martxan ezartzeko tailer praktiko bat antolatuko da eta bukaeran argazki handi bat egiteko xedea dugu.

Zer da zehazki Euskaraldia?

Gure ingurunearen aldatzea eta euskalduntzea norberaren esku ere dela jakinik, euskaraz komunikatzeko engaiamendua hartuko dute parte hartzaileek. Gure egunerokoa aldatu gabe, gure hizkuntza ohituretan eragitea da ariketa kolektibo honen muina.

Ekimenen honen eragile nagusiak herritarrak izanen dira.

Itsasun, herritarrak aktibatu nahi ditugu, urte bukaerako 11 eguneko Euskaraldia ekimenaren bultzatzaile izan daitezen. Erran bezala, ekimen kolektibo hau ez da berria eta egin izan dira herri batzuetan gisa berekoak.

Hala nola, iragan azaroaren 27tik abenduaren 3ra Miarritze, Angelu eta Baiona mailan antolaturiko BAM! astea. Oroit gara nola hiru hiri hauetako 800 bat lagunek parte hartu zuten ekimen hartan. Euskaraldia ekimenak duen berritasun nagusia ondokoa da: memento berean Euskal Herriko herri guztietako jendeak parte hartuko duela.

Eremu pertsonalaz gain, eremu kolektiboan eraginen du beraz ariketa honek.

BAM! ekimenaren formatu bertsua ukanen du Euskaraldiak: bi profil (Ahobizi euskal hiztunentzat eta Belarriprest euskara ulertu baina erabiltzeko gaitasun mugatua dutenentzat). Txapa soinean, hamaika egunez hainbat engaiamendu beteko dituzte parte hartzaileek. Ipar Euskal Herriko errealitate linguistikoa kontuan harturik, dudarik ez da inportantzia duela Euskaraldia ekimenak.

Erabilpenean eragiteko xedea du Euskaraldiak. Hori da bere funtsa eta horretara doa.

Xehetasun gehiagorentzat :

IEHEuskaraldiarenAbiatzea