par 
Iparralden Euskal Irratiak hastapen hastapenetik Irrati parte hartzaile gisa arizan dira. Izan dadin tokiko berriketariekin edo emankizun berezien animatzaileekin, betidanik herritar laguntzaileen parte hartzearekin aintzina joan dira tokiko eta euskarazko irrati hauek.
2012-2013 urtean, Bizi! Mugimenduak Bizirik! emankizuna animatu du, hilabetean behin « larrialdi ekologikoa eta justizia soziala » euskal uhinetan uztartuz.
Enbata.info-k, Bizi!ko bi kide galdezkatu ditu esperientzia horren berri ukaiteko.
Zer helburu zinuten “Bizirik!” emankizunarekin ?
Maialen : Hastapenetik arlo ekologiko eta sozialeko ardura/informazio/gogoetak mundu euskaldunean zabaltzea zen xedea. Hortarako Euskal Irratiek dituzten 10 000 entzule erregularrei eta 40 000 noizean behineko entzueleei emankizun bat eskaintzea pentsatu dugu.
Nikolas : Bestalde, Bizi!ren web gunean gune euskaldun « aktibo » bat antolatu da. Bertan Pikutara Fanzina aurkitzen ahal da eta orain arte egin ditugun emankizun guziak eskuragarri dira : www.bizimugi.eu/eu/talde-funtzionalak/bizirik-emankizuna/.
Maialen : Proiektu hori Bizi!ko 2012ko Biltzar Nagusitik etorri da. Ideia da Bizi!ren baitan euskarazko bizi/gogoeta/trukaketa guneen indartzerat… besteak beste Bizirik! Emankizunan euskaldun berri eta zaharrak parte har araziz
Zer lortu da?
Maialen : Hilabetean behin, Bizi!-ko kidez osatu talde batek, irrati-emankizun baten grabatzea. “Bizirik” deitzen da. Gai ekologista eta sozialak aipatzen ditu.
Nikolas : Lortu dena da Bizi!n 10 bat militante engaiatzerat, ideien trukatzerat hilabetero hainbat gai jorratzeko, gomita ekarrarazteko eta gogoeta ezberdin zabaltzeko uhinetan.
Maialen : Euskal Irratietan, hilabeteko 3. astelehenean, arratseko 7:00etatik goiti emankizuna zabaldu da eta ondotik Bizi!-ren webgunean zintzilikauta izan.
Nikolas : Hilabetero gai nagusi bat (10 min) aipatu dugu : gomita zuzenean edo inkesta batekin… Bestalde ‘ekolo ta sozial’ munduko azken berriak eta hitzorduak jarraitzeko parada eskaini dugu.. musikan !
Zehazkiago, zein dira aipatu dituzuen gaiak ?
Maialen : Irakurleek ideia bat ukaiteko, aski dira aipatzerat aurten tratatu ditugun 10 gai nagusiak. Zero Zaborretik hasiz… uda honetan Okzitaniako Tolosan iraganen den Europie Festi-Foro-rat, Trantsizioa, Oparitu xahutu gabe eta Zaharkitze programatua aipatu ditugu.
Nikolas : EHLGren urtebetetzea kari Lurzaindiaren berri eman dugu, Euskal Monterana ere, Bizi! Plazaratutako “Udal Tresna Kutxa”, Autoari Alternatiba eta Laborantza Biologikoaren zereginak uraren zaintzeko arloan.
Datorren sartzean segitzeko prest?
Maialen : Aurtengo esperientzia ona izan da. Beharrik gutartean baginituen irratigintzan teknika aldetik esperientzia bazute bi kide. Datorren urtean ere espero dugu lehen urteko esperientzia lagun jarraitzea.
Nikolas : Emankizunak aintzinetik grabatzeak hein batean lan gehiago emaiten du… Nork daki teknikan, eta irratiko, hots ahozko komunikazioan, konfiantsa hartuz geroz, zuzenean ere egiteko maila lortzen dugun.
Maialen : Irailetik goiti berriz bilduko gira Euskal Irratiekoekin ikusteko nola antolatu datorren ikasturtean. Gure aldetik prest gira aurtengo esperientzia lagun aintzina segitzeko.Bizi!ko kideen ideia eta proposamenak bilduz (izan ditezen berri, hitzordu edo gai nagusientzat), Bizi!n diren euskaldun zahar eta berriak animatuz, hainbat ekitalditan elkarrizketak grabatuz edo gomita ezberdinak estudioetan errezebituz.