Herriko Etxetako hauteskundeak izaten dira abertzaleek lehenesten dituzten bozkak. Beren proposamenen oihartzuna neurtzeko, baita ere kolektibitateen kudeantzarako duten gaitasuna frogatzeko. Hona Xabi Larraldentzat zer den jokoan 23 eta 30-ko hauteskundeetan.
Heldu diren herriko bozkek momentu politiko nagusi bat ordezkatuko dute Iparraldearentzat. Izaitez hauteskunde horiek hitzordu inportante bat markatzen dute, arlo politikoan herritarrengandik hurbilena den podere-gunea ordezkatzen duelako herriko etxeak.
Maila hortan, herritarren egunoroko biziari begira biziki garrantzia duten eremu batzuk kudeatzen dituzte herriko etxeek; horien artean, hirigintza bistan denez, bainan ere lurra eta etxebizitza eremuak. Aldi honetan gainera, bozka-araua aldatua zaigu, 1.000 biztanle baino gehiago dituzten herrietan zerrenda propioak aurkezten ahal baitira (orain arte, 3.500 biztanle baino gehiagokoetan).
Proiektu ezkertiar eta abertzaleak
Zuzenagoa den joko-zelai honetan, iniziatibaz kokatzen ari den indarra proiektu ezkertiar eta abertzalea da. Alabaina, arau aldaketa honek hunkitzen dituen herri gehienetan zerrenda abertzaleak aurkezten dira, kasu askotan ezkerreko ikuspegi batetik beste sentsibilitateetako jendei idekiak diren hautagaitza batzuen bitartez. Hortik proiektu abertzale eta ezkertiarra indarturik aterako da. Bainan haratago, demokrazia bera eta eztabaida politikoa azkarki sendotuko dira. Izan ere, hainbat herrietan, jauntto batzuk parean oposiziorik gabe herriko etxea kudeatzeko ohitura hartua dute aspalditik.
Orain, sistema berriarekin, hauteskunde hitzordu batzuetatik haratago, oposizioa, eta bereziki abertzaleak, herriko etxean ordezkatuak izanen dira, eztabaidetan kontradikzioa ekarriz etengabe. Horri guziari, herriko bozken emaitzek gaur Iparraldean bizi dugun egoera politikoaren testuinguruan hartuko duten zentzu berezia gehitu behar zaio.
Hiru gai ditugu bereziki inportanteak momentuan. Alde batetik, konponbide prozesua. Aieteren konferentziarekin, eta ETAren behin betiko suetenarekin egoera berri bat sortu da Euskal Herri osoan. Bestaldetik, azken hilabeteetan Lurralde Kolektibitatearen inguruan finkatu den adostasunak eta garatu den dinamikak eztabaida instituzionalaren konfigurazioa arrunt aldatu dute. Azkenik, Suprefeturaren eskutik Seaskak pairatu behar izan duen ofentsibak herriko etxeek bere garapenari ekartzen ahal dioten laguntza izorratzeko helburu argia du.
EH Bai egonkortu
Hiru gai horien inguruan, Pariseren jarrera argia izan da azken garaietan: ezezkoa, blokeoa, erasoa. Giro eta egoera honetan, proiektu abertzale eta ezkertiarrak bere erroak eta Iparraldeko gizartean duen eragina sendotzeko eta azkartzeko gaitasuna duela frogatzea funtsezkoa da.
Gure indarrak bilduz, proiektu abertzale eta ezkertiarrak Ipar Euskal Herrian hirugarren indarra ordezkatzen duela adierazten dugu azken urteetan. Hau da momentua baieztapen hori errealitate saihestezina badela frogatzeko! Eta hauteskunde horien biharamunetik, proiektu ezkertiar eta abertzalearen potentziala ordezkatzen duen mugimendu politiko orokorra –EH Bai– egonkortzeko eta egituratzeko hitzordua finkatua dugu.
Erronka sinplea da: gure zatiketak gainditu behin betiko, eta herrietan lanean ari diren militante abertzale eta ezkertiarrekin beren militantzia politikoa eramateko kuadro amankomun orokor bat eraiki, sinesgarritasun eta indar handiko mugimendu politikoa altxatuz Iparraldean.
Hortara, herriko bozken biharamunean, EH Bairen ibilmolde eta antolaketa berria zehazteko prozesua martxan jarriko da. Horri begira militante guzien parte-hartzea ezinbestekoa izanen da. Beraz, ondoko aste eta hilabeteetan lana ez zaigu eskastuko… Bainan duda izpirik gabe, Iparraldean mugimendu abertzaleak, bere ibilbide luzeari begirako perspektibatik, aitzin-pausu izigarriak emanen ditu ondoko aste eta hilabeteetan.