« Zergatik hil du? »

PrintFriendly and PDF

Zer da « Nobela beltza bat« … eta zein dira Euskal Nobela Beltzaren ezaugarriak ?
Nobela beltza definitzea ez da gauza erreza eta ez dugu gure burua hori argitzen ikusten. Guk bere zentzu zabalean hartu dugu eta asmoa dugu aste hortan izanen diren solasaldi eta egonaldi guziekin zerbait zehaztea. Hala ere argi dago aldatuz joan dela eta NORK HIL DU? galderatik ZERGATIK HIL DU? aldaketa hori interesatzen zaigula. Nobela beltza gaur egun jendartearen alde ilun hori erakusteko tresna baliogarri gisa ikusten dugu, kritika soziala egiteko.

Nola sortu da Euskal Nobela Beltzaren Astea?
Euskal nobela beltzaren astea antolatzeko asmoa Baztango idazleekin solasean ekimenean parte hartzen dugun zenbait kideren artean sortu zen. Ekimen hortako partaide batzuk irailean biltzen hasi ginen, genero horri buruz genekiena konpartitzen eta generoari buruz ikasten. Horien artean ohartu gara badirela aspalditik euskaraz idatziak diren nobela beltzak eta Baztan anitzetan agertzen dela nobela beltza horietan. Harrigarria egin zaigu Mariano Izetak idatzi zuen lehendabiziko nobela genero hontakoa dela jakitea.

Ba ote dira beste parada batzu urtean zehar Euskal Nobela Beltzaren « hurbiltzeko »?
Lehendabiziko aldia da nobela beltzaren inguruan honelako ekimen bat antolatzen dela. Hala ere, Euskal Herriko bertze irakurle taldeetan ere euskal nobela beltza irakurri eta idazleekin solastatzeko egokiera izaten da.

Zein dira aurtengo astearen ezaugarriak?
Egitaraua osatzerakoan esparru ezberdinak jorratu nahi izan ditugu, bai eduki aldetik baita espazio aldetik ere. Hala, mahai-inguruak, liburu aurkezpenak, ipuin-kontaketak, bertso trama… izanen dira Baztango herri eta gune desberdinetan. Guk antolatutakoaz aparte, Idazleekin solasean ekimenak eta Baztango Udalak beren ekitaldiak antolatu dituzte, egitaraua osatzen lagunduz. Baztanen egiten badugu ere, Euskal Herri osoa konbidatu nahi dugu bertan parte hartzerat. Hala, astebukaerako lo egiteko eskeintza berezia egin dute Baztango nekazal etxe batzuek. Larunbateko bazkarirako txartelak eskuratzeko (15€) ilbeltzabaztanen@gmail.com posta elektronikoan izena eman behar da edo Elizondoko Intzan, Arizkungo Dolaetxean eta Erratzuko Zubi Puntan txartelak erosi. Informazio guzia ilbeltza.blogspot.com blogean edo jarai Twitter @ilbeltza.

Egitaraua zehaztuz:
Asteazkenean Eneko Aizpurua Anizerat etorriko da Herensuge gorriaren urtea liburuari buruz solastatzeko.
Ortzegunean Udalak berrargitaratu duen Mariano Izetaren Dirua galgarri liburuaren aurkezpena izanen da eta ondotik Jon Abrilen eskutik Mariano Izeta, euskal nobela beltzaren abiapuntu solasaldia. Ortziralean Baztanen gertatu izan diren kontu beltzak kontatuko ditugu Elizondoko gaztetxean.
Larunbata goizean mahai inguru bat izanen da Itxaro Borda, Jon Alonso eta Miel Anjel Elustondorekin, orokorrean nobela beltzari buruz eta bereziki euskal nobela beltzaren garapenaz solasteko. Mahai ingurua den biztartean euskal nobela beltzaren erakusleihoa deitu dugun erakusketa eginen dugu, jendeak euskaraz idatziak diren nobela beltzen uzta ikusi ahal izateko. Ondotik bazkaria izanen dugu Eskisaroi jatetxean eta kafearekin batean liburu eta komiki baten aurkezpena: Juan Kruz Igerabideren Zangotraba eta Joseba Larratxe “Josebisky”ren Requiem gauaren erdian. Larunbata Gau Susmagarriarekin akituko dugu, Iruritako Jauregiarte tabernan eginen duguna.
Igandean ibilaldi bat eginen dugu Amaiurren han gertatutako bertze kontu beltz bat gogoratuz eta lekua ezagutuz. Igande ilunabarrean akituko da gure astea bertso trama batekin. Nobela beltza gai gisa hartua bertsotan arituko dira Odei barroso, Alaia Martin, Maialen Lujanbio eta Unai Iturriaga Fernando Anbustegi gai jartzaileak sortuko dien tramari segika.

NOBELAbeltzaAFITXA

NOBELAbeltzaEGITARAUA

 

Un commentaire

  1. Jakes LAFITTE
    Publié le 20/01/2015 à 09:04 | Permalien

    Nire ustez, haren ideoloji eskuindar eta fasistarekin ados ez naizen arren, Jon Mirande Zuberotar Paristarrak bere lekua ukan beharko luke mintzaldi horietan. Ipuin beltz batzuk idatzi baitzituen (Gauaz parke batean adibidez) eta euskal literatura modernoaren ekintzaileren bat izan baitzen.