par 
Amaia Muñoa, ELAko Idazkari Nagusi ordea
ELAk duela hogei urte pasatxo ezagutu zuen Mixel. Lizarra-Garazi garaietan. Ordungo ELAkide batzuk izan zuten lehen solasaldietarako aukera eta ibilbide luze bati hasiera eman zioten; gaur egun arte. Luzea bai, baina lerro hauek idazten ditudalarik Mixelekin gehiago egon, gehiago hitz egin, gehiago partekatzeko gogo handia gelditu zaidala esan behar det, hain pertsona interesgarria, aberasgarria eta atsegina izan bait da neretzat, ELArentzat eta Euskal Herriarentzat.
Mixelek agian ez lituzke besteentzako irakaspen bezela aurkeztuko, baina gure iritziz, Mixelekin guk ikasitakoak asko dira.
Lehenik eta behin, ezinezkoak diren helburuak posible bilakatzeko zuen gaitasun aparta. Justizia eta zuzentasunean oinarriturik, zera erakutsi digu: beharrezkoa da sinestea gauzak alda daitezkeela eta horretarako lana egin, luzez eta engaiamendu osoz. Laborantza Ganbararen proiektua eta armagabetzea dira horren erakusle zoragarriak.
Eta hori nola egin? Iritzien sintesia egiteko erakutsi duen gaitasuna deigarria izan da oso. Horretarako badakigu zein seriotasunarekin hartu duen beti denekin hitz egin beharra, behin, bitan, hirutan eta berriz bueltan, argitu nahi zuena lortu arte. Horrekin eraiki du helburuak lortzeko estrategia. Bere egiteko modu hori praktikatu du “alde guztiekin”: bere aldean zeuden bidelagunekin, bere aldearekin bat egin zezaketen desberdin guztiekin eta baita helburua lortzeko parean kokatutakoekin.
Badakigu baita, zein erabakigarria izan den bere aurrera jarraitzeko indarra. Batzuk buru gogortasuna deitu diote eta egia esan, momentu batzuetan hala zirudien, batez ere ate guztiak -itxuraz- itxita egon direnean. Baina zirrikitua ikusten duenak aurkitzen du indarra ateak zabaltzeko. Hori izan da Mixel. Eta hori baino gehiago behar da, noski. Ateak ez bait ditu batek bakarrik zabaltzen eta are gutxiago paretak mugitzen. Mixelek eraiki eta praktikatutako estrategian ezerk ez du zentzurik kolektiboa ez bada. Sindikalgintzan gabiltzanok ondo dakigu: borroka eta lorpenen oinarria kolektiboa da. Gehiengoaren interesa defendatzeko, kolektiboaren indarra aktibatuz eta elikatuz egiten degu aurrera. Eta orain, aurrera egiteko, Mixelen ibilbide militante luzearen fruituak eta irakaspenak gurekin ditugu, elkarrekin bidea egiten segitzen degun guztiontzat.
Eskerrik asko, Mixel