Hirukasko 2014: mendia, kirola eta musikaren besta!

PrintFriendly and PDF

HiruKaskoAurten ere, 2014ko ekainaren 21ean iraganen da “Hirukasko” ekitaldia, Bidarraitik Itsasurateko norabidean. Desafioa gustukoa duten jendeak ohizko 3 mendietarat gomitatzen ditugu (“Iparla”, “Irubelakaskoa” eta “Artzamendi”) gogoko duten erritmoan ibiltzen ahalko direlarik : kirolarienak lasterka, lagun arteko oldar onean – ala kurri, naturarekin denbora hartzea maite dutenek, 2 ala 3 kaskoen bururatzea dutela helburu!

Hemen bakotxak bere ahalak eta nahikeria segitu beharko ditu, ingurumen zoragarri hunen errespetu bizian deno.

Mendizale suhar eta Hirukasko-ren sortzaile historiko izandako J.M. Landarretxe jaunak dion bezala : «materiala egokitu, xahakoa hartu, galtzak zapatetan sartu, makila eskuan tinkatu, zakutik ateratzen den lukinka muturraren usaina gozatu eta aide!…»

Ez dezagun ahantz aurten ospatzen dugula aspaldiko desafio miresgarri hunen 25garren urtehurrena. Karia hortarat musikaren besta gurekilan juntatu zaigu, giro on eta umore hoberenean egun ahaztezin horren partekatzeko. Mendi martxa, haurren jostaginak (Kayak, tiroliena, etabar…), Botaluze xapelketaren erdifinalak, musika kontzertuak (aratseko kontzertu zerrenda lekuko), gau-eskolako sukaldari adituen errezeta hoberenek osatu afaria, eta beste… Informazio gehiagorentzat gure webgunea ikus ezazue: www.hirukasko.org

Beraz, izanikan  lasterkari ala kurritzale, zure egutegian oraindik erreserba ezazue ekainaren 21ko data, hitza pasa adixkideeri eta hurbil zaitezte usaiako izen-emaite salguneetarat maiatzaren 20etik aitzina… Laster arte !

Landarretxe

Jean-Marc Landarretxe-en lekukotasuna, Hirukaskoren hastapenaz

 

Mende laurdena ospatzen dituen mendialdiaren hastapenak

« “89ko ekaina” : Goizeko 2ak, Patxaraneztatu apairuaren bukaera, hitzak errexki lerratzen dira, indar fisikoak emendatuak senditzen dira, zoingehiagoka eta parioen tenorea dugu biharamun zailen menturan…

Hiriburuko Uhaina eta Angeluko Ibaialde elkarteen arteko parioa trenkatua da, hitzordua hilabete undarreko egunsenti batez finkatua delarik, Itsasuko Ondoria ostatuko aparkalekuan berean, Artzamendi, Irubelakasko eta Iparlako aldapek arrazoinamendua emanen dutelarik. 8 partaidez osatu 2 taldeak buruz buru diraude, irriak zakuetan gorderik eta iraupen luzeko indarren peskizan.

Gogora dezagun egun berezi horren osatzeko errezeta : Igaiten gira, jausten gira, igaiten gira, jausten gira, Sumus-eko Mailux-en etxean zerbait jaten dugu, arra-igaiten gira, arra-jausten gira, Bidarrai-ko Nobliarenean afaltzen dugu eta Hazparneko bestetan azken izerdiak botatzen… saka dezaun beraz!…

Materiala egokitu, xahakoa hartu, galtzak zapatetan sartu, makila eskuan tinkatu, zakutik ateratzen den lukinka muturraren usaina gozatu eta aide!
16kote lerrokatua abiatzen da, zatitzen da, metatzen da, trabatzen da, luzatzen da, banatzen da, oldartzen da, galtzen da eta dozena bat oren luzeren buruan berriz juntatzen da Noblia ostatuko terrazean.

Egun mugimendutsu horren bukaeran, ohar finko batzuk denak adosten dituzte :

  • Egingarria da, bainan hobe ditaike entrenamenduarekin !
  • Partaide kopuru doblearekin aurreikusten dugu ondoko urteko hirukasko !
  • Hazparneko bestak baztertzen ahal ditaizke gaurko !

Eta Ibaialde edota Uhainaren artean garaile nor atera zen jakiteari dagokionez, ez da nehoiz jakin zonbat sormarka hirukaskotar lortu ahal izan ziren egun hartan.

Nobliaren zubiko laminen leiendak dionaren arabera, Ibaialde-ko 8 kideetarik 10-ek 3 kaskoak gainditu omen zituzten, bainan informazio iturri hori harpeko sainduarena bezain dudakor geldituko da mendeetan barna… »

Bakotxa bere erritmoan, bakotxak bere desafioa

Hirukasko, mendiaren panoramaren ederrean ezagutzen duzue? jendeen arteko umore on eta laguntza kolpe sendoen bitartez? norberarenganako desafio kartsu baten indarkeriaz? Hori guzia da eta gehiago ere… aurten jaz bezala, aisialdi mementu goxoen partekatzeko gogoz gatozkizue; hiruzpalau aktibitate desberdin proposatuz.

HiruKaskoAfitxaHala nola, mendeetan barna zaindua izan den pilota joko zaharrenetarik bat izanen dugula erakusgai. « Botaluze » jokoa atharriko zelai berdeetan prestatuko dugu publikoaren eskujoko eta abileziak neurtzeko gisan. Euskal herriko lehiaketaren laurden finalak izanen dira hor ikusgai. 5 pertsonako talde trebatuak onartuko dira, bata bestearen kontrako xapelketa bihurri baten inguruan. Kurios, interesatu eta afiziatu guzieri gomita luzatzen dugu karia hortarat!

Bigarrenik, urtxintxaren abilezia nork ez du amesten? zuhaitzez zuhaitz airean ibiliz sentsazio azkarreko memento goxoak eskainiko dizkiegu gureganat hurbiltzen diren haur eta nerabe gazteeri. « Tirolienne » joko famatua plantan emana izanen zautzue inguruko zuhaitzetan barna, mugarik gabeko denbora pasa baten oinarri.

Azkenik aurtengo berrikuntza, herriko urjoko elkartearekin partaidetzan « rafting » jausteen zirkuitu bat apailatuko dugu haurren zorionerako. Jakin badakigu sekulako iduzki pollita egiten badu, adin ttipikoek arras preziatu dezaketen aktibitatea izan daitekeela. Beraz jauntzi ureko abarkak, larru arrasekoak eta zauzte gure ur gardenen jastatzerat!

Aktibitate ainitzak beraz, lur-aire ala ureko joko ainitzekin, batez ere adin ttipikoen zerbitzuko. Nota zazue ekainaren 21a eta zatozte denbora pasa familian ere; mendirat engaiatzen ez denak ere bere lekua atxeman bait dezake. Sarrera guziak urririk izanen dira.

Zauzte nunbrean gure umore ona partekatzerat !

  • Newsletter



  • Soutenez Enbata

    En-kiosque2015-05-FR

    Soutenez Enbata ! A partir de 40€, recevez chaque mois Enbata magazine dans votre boite aux lettres.

    Abonnez-vous / Soutenez-nous

  • Thématiques

  • Mots-clés

  • Vidéos

    video