par 
Daniel Barberarena – Laboraria eta Euskal Herriko Laborantza Ganbarako bulegoko kidea
2019 Urriko Izar Lorea-ren 101. zenbakiko Sar Hitza:
«Ez ditugu erremedioak gelditzen ahal landare eta kabalentzat. Ñiñien xertoak eta minbiziaren ximioterapia guziak gelditzen bagenitu bezala, egun batetik biharamunera.» Horra zer adierazpen harrigarria egin daukun Paueko laborantxa ganberako lehendakariak, departamenduko 200 auzapezen aitzinean (irailaren 16ko artikulua, Sud-Ouest webgunean ateraia).
Erranaldi horrek garbiki erakustera emaiten dauku zer nolako bidea segitzen duten Paue aldean. Bai zinez, leize handi bat bada heiek defenditzen duten laborantza produktibista eta hemen sustengatzen dugun laborantza herrikoiaren artean. Biharko desafio handiak gainditu beharko ditu laborantzak, izan janariaren kalitatea, ingurumenaren zaintza (uraren kalitatea, klima aldaketa) eta nola ez, herritarren osagarria.
Desafio horier buru egiteko, lanean ari gira Euskal Herriko Laborantza Ganbaran. Nola ez aipa agroekologiaren egun arrakastatsuak, Behaskaneko Jauberrian, hazien ereiteko molde berrietaz eta Ainiza Bastidarteko lurretan, pentzeen eramaiteko maneretaz. Biharko desafioak gainditzeko, informazioa bildu behar da, entseguak egin, elgarren artean trukatu eta noizbat praktikatu. Ez bagira denak bio sailean sartzeko prest, Euskal Herriko Laborantza Ganbarako logoak erakusten duen bezala, pozoi eta onkailu kimikoen erabiltzea ttipituz aitzinatu behar dugu hala ere. Gure praktikak hobetu behar ditugu, urtez urte. Adibidez, zergatik ez entseatu gisua pozoiaren orde, pentzeetako harren kontra ?
Laborantza herrikoiak arrakasta handia dauka. Aski da Hergarai aldeko feria begiratzea edo ixtante iraganen den Lurrama egunetara hurbiltzea (Nafarroa izanen da aurtengo gomita).
Bainan laborantza herrikoiak badu zure beharra laborariek gure praktiken hobetzeko. Jakin ezazue mementu huntan eramaiten dugun sos biltze kanpainan bildu euro guziak laborantza herrikoiaren alde erabiliak izanen direla.
Laborantza aldatzeko urratsak ez dira Parise ez eta Pauetik etorriko. Beraz, zu ere irakurle, sar zaitez laborantza iraunkorraren dinamikan!
Duela denbora gutxi erreportaia on bat ikusi nuen Frantziako telebistan. Japonian irriztegietan ahatetxoak erabiltzen dituzte pestiziden ordez parasitak deuseztatzeko. Bide berria erabiltzen hasi da Kamargan. Nere ustez halako soluzioetarantrz zuzendu behar ditugu nekazaria babesteko metoduak eta multinazionalek irentsi nahi dizkiguten pozoi guztiak baztertu.